Aldrebesa da mundua

Aldrebesa da mundua. Aldrebesa da, nola astean zehar, etxean edo lanean egotea behar genukeenean, eguzkia aritzen zaigun ate joka, eta horrela uzten ditugu astebururako eginda eduki beharko genuen guztia. Alderantziz, asteburuan, irtetzea zilegi denean, eguraldiak ez digu lagundu nahi, eta sarritan igandea bailitzan geratzen gara larunbatetan sofan eserita, pelikula eskasak ikusten.

Aldrebesa da, nola dugun beti diruaren premia handiena, larritasunez, txikle bat erosteko dirurik ere ez daukagunean. Edo nola den posible munduko alkohol guztia edanda ere, mozkortu ezin garen parrandak izatea, eta nola mozkortzen garen nahi gabe, mozkortu nahi ez, eta ia edaten ez dugunetan.

Aldrebesa da, nola bidaltzen diren milaka polizia, erreferendum bat gelditzeko, hori bai, demokraziaren izenean. Aldrebesa da nola isiltzen diren ahoak “herriak du hitza” edo “herriak erabaki” lemapean bizi den estatu batean (horixe baita demokraziak bere horretan esan nahi duena).

Aldrebesa da, nola maite duten sua piromano ez diren aberatsek. Aldrebesa, nola ez doazen Galiziara sutea gelditzera Kataluniara joan ziren milaka polizia horiek. Aldrebesa nola maita dezaketen hainbeste sua piromano ez direnek. Edo, zergatik ezin zaion piromania deitu, diru truk Galizia osoa erretzeari.